Lula akuzas Israelon je genocido

de Vilhelmo Alvarado

La prezidento de Brazilo, Luiz Inacio Lula da Silva, lastatempe esprimis serion da konvinkaj veroj pri tio, kio vere okazas en Mezoriento, precipe en la martirigita Gaza Zono, submetita al intensaj bombadoj kaj cionismaj teratakoj.

Kun la aparta klareco, kiu lin karakterizas, la iama sindikatestro kaj fondinto de la Laborista Partio, asertis, ke Israelo faras "genocidon" kontraŭ palestinaj civiluloj en Gazao kaj komparis la cionismajn agojn kun la kampanjo de Adolf Hitler por ekstermi la judojn en  Eŭropo.

"Kio okazas ne estas milito, ĝi estas genocido," diris Lula al raportistoj en la etiopa ĉefurbo, kie li estis invitita partopreni en la ĉiujara Pintkunveno de Afrika Unio.

Krome, la iama metallaboristo kaj triaperioda prezidento de la plej granda lando en Latin-Ameriko kaj Karibio, diris, ke io simila okazis nur unufoje en la historio, kiam Hitler decidis mortigi la judojn.

La vortoj de la reganto havis rimarkindan efikon sur la internaciaj amaskomunikiloj, kaj ili ripetiĝis en la ĉefaj ĉefurboj de la mondo kaj, kompreneble, atingis Tel-Avivon.

La cionisma ĉefministro, Benjamin Netanyahu, ekfurioziĝis kiel kutime faras ĉiuj mensogantoj kaptitaj en siaj propraj retoj, kaj alvokis sian ambasadoron en Braziljo.

Kiel okazas en ĉi tiuj kazoj, la registarestro diris, ke kompari Israelon kun la holokaŭsto de la nazioj kaj Hitler signifas transiri ruĝan linion kaj insistis pri la obstina malvero, ke lia lando batalas "por defendi sin".

Kurioza maniero defendi sin estas mortigi infanojn, virinojn kaj maljunulojn kaj senigi la malsanulojn kaj vunditojn ricevi medicinan prizorgon atakante hospitalojn kvazaŭ ili estus militaj celoj.

Lula, kompreneble, estis deklarita persono non grata en Israelo, kio laŭ mi konsistigas grandan honoron por la brazila prezidento, kiun oni kutime akceptas kun grandaj korinklinoj kien ajn li iras por sia senĉesa batalo por justeco kaj egaleco.

La brazila prezidento, cetere, vojaĝis al Etiopio por profundigi la politikajn kaj ekonomiajn ligojn de sia lando kun la afrika kontinento, kun kiu ekzistas fortaj kulturaj kaj historiaj ligoj.

Tie li esprimis al la gvidantoj de tiu kontinento, ke la solvo de la mezorienta krizo daŭros nur se rapide progresos al la kreado de libera kaj suverena Palestina Ŝtato, tio, kion Vaŝingtono kaj Tel-Avivo kontraŭstaras kun malico kaj impeto.