Nov-Jorko, jul 2 (RHK) La Kontrola Misio de UN en Kolombio agnoskis, ke la manifestacioj kaj protestoj en la kunteksto de la Nacia Striko esprimas "senprecedencan socian maltrankvilon" en la sudamerika lando.

Laŭ la raporto de UN-misio, almenaŭ 54 civiluloj estis mortigitaj kaj centoj vunditaj kiel rezulto de la subpremo de la manifestacioj fare de la Mobile Kontraŭ-Tumulta Taĉmento (ESMAD) de post la komenco de la protestoj en la 28a de aprilo.

Ili avertis pri la pliiĝo de murdoj kontraŭ eksbatalantoj kaj sociaj gvidantoj, en sia trimonata raporto, kiu kovras la monatojn aprilo, majo kaj junio.

Alia el la situacioj evidentigitaj de UN estis tiu de devigita delokiĝo, kiu laŭ agentejaj funkciuloj tuŝis komunumojn, sociajn gvidantojn kaj eksajn batalantojn en 25 municipoj en la departementoj Antioquia, Cauca, Caquetá, Guaviare, Meta, Nariño, Nordo de Santander , Putumayo kaj Valle del Cauca.

UN emfazis, ke malgraŭ la progresoj faritaj en la efektivigo de la Pac-interkonsento, ankoraŭ ekzistas gravaj mankoj, precipe en la ekonomiaj garantioj por la homoj, kiuj demetis la armilojn.

La ĝenerala sekretario de UN, António Guterres, indikis, ke neperforto, dialogo kaj interkonsento estas la vojo, kiu permesos al Kolombio antaŭeniri al repaciĝo kaj restarigo de ĝia socia teksaĵo.

La raporto de la Kontrola Misio de UN pri la situacio en Kolombio, kiu kovras la periodon de la 27a de marto ĝis la 25a de junio 2021, estos liverita la 13an de julio al la Sekureca Konsilantaro de Unuiĝintaj Nacioj.

Laŭ datumoj de la plurflanka organizo, en la lastaj tri monatoj, 49 defendantoj de homaj rajtoj kaj 16 eksaj batalantoj estis murditaj, kaj almenaŭ 19 masakroj estis dokumentitaj, el kiuj dek estas enketitaj.

Fonto: Telesur