Kabulo, aŭg 24 (RHK) Eksa afgana parlamentanino Fawzia Koofi diris hodiaŭ, ke estonta registaro de la centra azia lando ne estos kompleta sen la ĉeesto de virinoj.

 "Afganinoj devas esti pli unuiĝintaj ol iam ajn. Neniu donos al ili siajn rajtojn facile. Ili devas esti unuigitaj kaj garantii sian ĉeeston, kaj ne akcepteblas sidi en la angulo de siaj hejmoj rigardante la situacion," Koofi diris al TOLO Novaĵkanalo.

Afganinoj volas, ke la registaro ĉesu ignori ilin kaj ne forprenu ŝancojn sub diversaj pretekstoj, diris Watrai Sayedi, aktivulino por virinaj rajtoj.

 Inkluziva registaro en Afganio devas reprezenti virinojn kaj ĉiujn etnojn en la lando, diris Tariq Farhadi, politika analizisto. Se ne, la talibana registaro ne estos akceptita de la afgana popolo longtempe, li emfazis.

La talibana movado pretas regi Afganion denove post 20 jaroj de la usona invado en supozata kontraŭterorisma krucmilito, kiu lasis la landon en pli malbona stato, kun centmiloj da mortintoj, multaj vunditaj kaj 11 milionoj da rifuĝintoj.

 Nun denove reganta, la radikala armita grupo devas batali kun la administrado de malriĉa lando detruita de milito.

La antaŭa periodo de talibana regado, inter 1996 kaj 2001, havis ekstreman fundamentisman aliron katastrofan pro siaj misuzoj kontraŭ virinoj, knabinoj, etnaj malplimultoj kaj eĉ edukado, kaj la lando tiam estis izolita internacie.

Post kaptado de Kabulo, la ribelantoj parolis pri respekto de la rolo de virinoj en la publika sfero, sed ili alfrontas grandajn defiojn garantii akcepteblan nivelon de politikoj de homaj kaj seksaj rajtoj, leĝojn pri amaskomunikiloj kaj civila socio, kaj etnajn rajtojn kaj de malplimultoj.

Fonto: PL