Romo, dec 31 (RHK) La papo emerito Benedikto la 16-a forpasis ĉi-sabaton en la monaĥejo Mater Ecclesiae de Vatikano, raportis la direktoro de la gazetara oficejo de la Sankta Seĝo, Matteo Bruni, kiu rimarkis, ke pli da informoj estos donitaj kiel eble plej baldaŭ.
La morto de Benedikto, 95-jara, okazis je la 09:34 laŭ la loka tempo, en la loko, kiu estis lia loĝejo ekde 2013, kiam li demisiis pro sanaj kialoj, post ok jaroj da pontifikado.
La 28-an de decembro, Bruni konfirmis en deklaroj al la gazetaro ke Benedikto la 16-a plimalboniĝis pro sia progresinta aĝo, post kiam Papo Francisko aludis al la delikata sano de sia antaŭulo en sia ĝenerala spektantaro.
La Supera Pontifiko petis tiun tagon "specialan preĝon por la papo emerito Benedikto, kiu silente subtenas la Eklezion", post kio li iris al la monaĥejo Mater Ecclesiae, en la Vatikanaj Ĝardenoj, por viziti la malsanan prelaton.
Post sia eksiĝo en februaro 2013, Joseph Ratzinger translokiĝis al la loĝejo Mater Ecclesiae, kie li vivis naŭ jarojn akompanate de sia sekretario, monsinjoro Georg Ganswein, kuracisto, flegistino kaj kvar konsekritaj laikaj virinoj, el la asocio Memores Domini, kiuj prizorgis lin.
