Foto de arkivo
Havano, feb (RHK) Kubo elvokas hodiaŭ la gerilan gvidanton Camilo Cienfuegos, unu el la plej karismaj kaj heroaj komandantoj de la Ribela Armeo, memorante la 93-an datrevenon de lia naskiĝo.
Camilo havis la konfidon de la maksimuma gvidanto de la lasta kuba liberecana heroaĵo, Fidel Castro, kaj de la argentin-kuba komandanto Ernesto Che Guevara, pro siaj kuraĝemo kaj oferoj en la bataloj kontraŭ la tiraneco de Fulgencio Batista (1952-1958).
Pri li, Fidel Castro iam deklaris, ke La Sinjoro de la Avangardo - la adjektivo kun kiu Camilo estas memorata ankaŭ - amis malfacilaĵojn, sciis alfronti ilin kaj kapablis plenumi heroaĵojn en la plej nekredeblaj cirkonstancoj.
Kune kun komandanto Guevara, li ĉefrolis en la liberiga invado de oriento ĝis okcidento de la insulo, kaj estis la senkontesta heroo de la batalo de Yaguajay, en la provinco de Sancti Spiritus.
Naskita en 1932, en la Havana kvartalo de Lawton, kaj fizike malaperinta la 28-an de oktobro 1959, Camilo estis unu el la ekspediciaj membroj de la Granma Jakto kaj fariĝis komandanto de la Ribela Armeo en la orientaj montaroj meze de la batalo kontraŭ la armeo de Batista.
En sia lasta parolado, la 26-an de oktobro 1959, antaŭ miloj da kubanoj kunvenintaj antaŭ la iama Prezidenta Palaco, li klarigis sian pozicion kiel neŝancelebla gardisto de la Revolucio, kaj sian fidon al la popolo:
"...ne gravas la ruzaj kaj malkuraĝaj perfidoj, kiujn ili povas fari al ĉi tiu popolo kaj ĉi tiu Revolucio, ne gravas, ke soldulaviadiloj venas homekipitaj de militkrimuloj kaj protektitaj de potencaj interesoj de la Nordamerika Registaro, ĉar ĉi tie estas popolo, kiu ne lasas sin konfuzi de perfiduloj," li deklaris.
Fonto: PL
