Bildo: Arkivo.

Havano, sep 14 (RHK) La Nacia Direkto pri Defendo de Kubo hodiaŭ disvolvas multoblajn agojn por garantii kaj restarigi la ekzercon de la rajtoj de homoj en situacioj de soci-leĝa vundebleco.

La Unua Vicministro pri Justico, Rosabel Gamón, klarigis en la televida programo Hacemos Cuba, ke la Oficejo de la Defendo estas strukturo kiu estas parto de la Ministerio de Justico kaj havas reprezenton en ĉiuj provincoj de la kariba nacio.

Ŝi klarigis, ke la institucio havas siajn jurajn bazojn en la Konstitucio de 2019, same kiel en la Proceza Kodo kaj la Familia Kodo.

Siaflanke, la direktoro de la Oficejo de la Defendo, Alejandro Redondo, precizigis, ke ĉiu kuba juristo povas labori en la organizo, eĉ se ili estas emeritaj, escepte de tiuj, kiuj laboras kiel juĝistoj, prokuroroj aŭ notarioj.

Li komentis, ke la Oficejo de la Defendo, ĉe la alveno de diversspeca kazo, preparas multfakan teamon de kuracistoj, psikologoj, sociologoj kaj psikiatroj, inter aliaj, por doni la respondajn gvidadon, orientiĝon kaj prizorgon.

Ni ofertas, li aldonis, konsilojn, subtenon kaj partoprenon en ĉiu el la juĝaj proceduroj kaj procezoj en kiuj la kandidato estas implikita.

Ekde sia kreado en 2023, la Oficejo de la Defendo registris entute 494 kazojn en la tuta lando, laŭ datumoj publikigitaj de la ĵurnalo Granma.

La institucio agas kiel jura rimedo kun speciala emfazo pri la protekto de infanoj, maljunuloj aŭ homoj en vundeblaj situacioj, same kiel viktimoj de manifestiĝoj de perforto, diskriminacia traktado kaj rompo de garantioj.

Fonto: TV Hacemos Cuba